ओइल दर्पण 
काठमाडौँ । १५औँ राष्ट्रिय बाल नाटक महोत्सवका लागी स्कृप्ट आह्वान गरिएको छ । शैली थिएटर, रुसी सदनको आयोजनामा संस्थागत विद्यालय संघ नेपाल इसानको सहकार्यमा महोत्सव आयोजना हुन लागेको हो ।
त्यस्तै, १५औँ राष्ट्रिय बाल नाटक महोत्सवका डाइरेक्टर नवराज बुढाथोकीले शैली थिएटरले हरेक वर्ष जस्तै यस बर्ष पनि राष्ट्रिय बाल नाटक महोत्सवका लागी स्कृप्ट आह्वान गरिएको जानकारी दिनुभयो । विगत १४ वर्षदेखि शैली थिएटरले आयोजना गर्दै आइरहेको नाटकको १२ र १३औँ महोत्सव भर्चुअल रूपमा सम्पन्न गरिएको थियो ।
उक्त नाटक महोत्सवका लागि पुस २२ गतेसम्म स्कृप्ट आह्वान गरिएको र माघ १ गते छनोट भएका नाटकहरू सार्वजनिक गर्ने तयारी रहेको शैली थिएटरका महासचिव सविन न्यौपानेले बताउनुभयो । त्यसैगरी, १५औँ बालनाटक महोत्सव सात दिनसम्म सञ्चालन गर्ने तयारी भइरहेको पनि महासचिव न्यौपानेले जानकारी दिनुभयो ।
विगतका दुई वर्षहरूमा अनलाइन माध्यमबाट भर्चुअल महोत्सव गरेको शैलीले यस पटक प्रतियोगी र अप्रतियोगी नाटक प्रस्तुत गर्दैछ । छनोट भएर मञ्चनमा लगिएका नाटकहरूलाई मञ्चनकै अविधमा विज्ञहरुको निर्णायक टोलीले विभिन्न पक्षबाट मूल्याङ्कन गरीने छ । बाल नाटक महोत्सवमा प्रतियोगि र अप्रतियोगी गरेर निर्णायक टोलीले नाटक समावेश गर्नुहुने छ । काठमाडौँ उपत्यका र बाहिरी जिल्लाहरूबाट पनि नाटक समावेश गरिने जनाइएको छ ।
२०६६ सालदेखि शैली थिएटरले आयोजना गर्दै आइरहेको नाटक महोत्सवमा पहिलो वर्ष ६ वटा नाटकहरू समावेश रहेका थिए । त्यस्तै, २०६७ सालमा १० ओटा नाटक मञ्चन भएका थिए भने, २०६८ सालमा ८ वटा, २०६९ सालमा १४ वटा, २०७० सालमा १० वटा नाटक समावेश रहेका थिए । त्यस्तै, २०७१ सालमा १५ वटा, २०७२ सालमा १२ वटा, २०७३ सालमा १५ वटा, २०७४ सालमा १५ वटा, २०७५ सालमा २० वटा, २०७६ सालमा १८ वटा तथा, २०७७ सालमा १२ वटा, २०७८ सालमा १० वटा नाटकहरू रहेका छन् भने, रूसी सदन कमल पोखरीमा आयोजना भएको २०७९ सालको महोत्सवमा २९ वटा नाटकहरू समावेश रहेका थिए।
बालबालिकाका विषयबस्तुलाई केन्द्रमा राखी कार्य गर्ने शैली थिएटरले विगत १४ वर्षदेखि हरेक वर्ष राष्ट्रिय बाल नाटक महोत्सव गर्दै आइरहेको छ । नाटककाे स्कृप्ट रूसि सदन कमलपोखरी र रातोपुल स्थित शैली थिएटरमा बुझाउन सकिने छ ।
